مَا نْرجَاوْ مْنّْكْ خير.. (زجل بالعامية المغربية)
عبد اللطيف بنيحيى
مَا نْرجَاوْ مْنّْكْ خير يَا وْلْدْ مْعَاشِي
وْلَا نْعَوّْلُو تْجِينَا مْنْ عَنْدْكْ بْشَارَةا
لْحِيط الِّلي بْنِيتِيهْ صار الْيُومْ رَاشِي
وْسْمْساركْ بَاع سْلْعتْكْ بْخْسارَة
لَا تْعَاشْر جَاهْلْ جْبْحُو خَاوِي
وْلَا تْخَالْطْ مْنْ هُو غَافْلْ عَنْ زْلَّاتُو
مْوَاجْ بَحرُو هَايْجَة بْرغَاوِي
قْلِيلْ النِّيَة سَاهِي فْصلاتُو
ضْيَاقْتْ قْشَّابْتْكْ مْعَ هَادُو يَالْمْجْذُوبْ
وْرْمَاتْكْ الْجْذْبَة بِينْ جْبَالْ وْكْدَاوِي..
الْقَاصَحْ ذَابْ وْالْهْشِيش فِيكْْ مَا بْغَى يْذُوبْ
وْكْلامْكْ صَارْ نَاشْفْ عْلِيلْ مَا يْدَاوِي..
مَا لْقِيتْ يَا سَاقِي بَاشْ نْوَاسِي وْسْوَاسِ
يوْلا فَادْنِي مْعَ جْرَاحِي غِيرْ كَاسْ رَاحِي..
تْهَدّْمْ كُلّْ مَا بْنِيتُو..وْسَاخْ بِيَّ سَاسِي
فْالتّْلْفَة هَايْمْ..نَايْمْ وَانَا فْنْعَاسِي صَاحِي..
